Milik Moal Pahili Bagja Pada Boga

MILIK MOAL PAHILI BAGJA PADA BOGA

Karya:

Sutara, SPd

Lawang Saketeng

Lalakon hirup jeung hirup ngalalakon

Hirup jeung huripna jalma diatur ku Allah, susah bungah jodo pati, papait jeung milik mung mantena anu terang, namung kapanasaran jalma tetep aya, sok paribasa hayang nyaho lalakon hirup jalma, patanya tanya kadang sok maca carita anu dikumpulkeun ngajadi buku, dumasar kana eta atuh simkuring oge jorojoy hayang ngumpulkeun lalakon hirup anu eusina hirup ngalalakon, intinamah kumpulan pangalaman anu geus kalakonan sabaraha waktu katukang.

Paralun ampun sanes mintonkeu kaagulan, estu hayang kailo ku murid atawa anak, minangka warisan anu teu sabaraha hargana tapi sugan jadi babandingan lalakon anu maca dina kahirupanana.Malakmanadar aya pulungeunana sasieureun sabeunyeureun anu hadena, pilihan piceuneun anau tojaiyah jeung agama darigamana.Jauh tanah kalangit kana sampurna, hampura samudaya kalepatan.

Waringin, 25 desember 2014

Sutara, S.Pd

1.BANJAR KARANG PAMIDANGAN

Dumasar carita kolot data autentik dina ijajah sokola dasar, kuring lahir poe sabtu, tanggal 5 bulan Juni taun 1964 di Desa Waringin Kec. Palasah Kabbupaten Majalengka, sakola Sd di SDN Ciborelang kec. Jatiwangi kabupaten Majalengka Jawa Barat,pun biang Saniah pun Bapa Sanen duanana teu gaduheun ijajah nanaon, tapi aranjeuna bisa nyakolakeun kuring dugi ka S.1 alhamdulilah.Pacabakan pun bapa Merebot Masjid Ciborelang ari pun biang mah ukur katut caroge alias teu gaduh pacabakan matuh. Aranjeuna hirup basajan tapi Allah ngarizkian nepika kuring tiasa nyangking Sarjana, Alhamdulilah kersaning Gusti Allah kuring bisa ngabagi ieu lalakon dina ieu tulisan, mangga lenyepan dugika tuntas.

2.GEMBEL PASAR

Mangsa keur leutik jaman barudak keneh kuringteh ibarat gembel ceuk ayeunamah, kusabab sok pupulung dipasar tapi lain papaling, rupaning sayuran, duit, suluh, kuntung rokok jeung nuliana, kasang tukangnamah lantaran butuh jeung kolot kurang pangan, tapi ceuk pada haritamah teu loba pikir era atawa gengsi ceuk barudak kiwari, mulung sayuran mangsa aya bongkar ti mobil, mulung duit lamun tas pasaran mingguan, mulungan suluh kayu kurut rangka lawon atawa kas wadah gula, mulungan kuntung roko keur jualeun kabandar, cenah jang bahan celepan batik.Tapi sakola teu kaganggu lantaran ieu pagawean wanci bubar pasar tengah poe sabada bubar sakola.

3.DIGAWE DITOKO MEBEL

Mangsa umur geus nincak kelas genep, milu digawe ditatangga anu usahana kana dagang mebel kayaning; korsi, lomari, ranjang, rak jeung sajabana, saban sore nimba ngesian bak mandi anu jangkuna sabeuheung mangsa harita, saban poe mingguna sok dititah nagihan kanu ngahutang mebel, kandaraanna sapeda najan jauh kaluar kacamatan oge.Pagawean anu matuhna muka jeung nutupkeun toko mebel, maraban ingon ingon anu dunungan, ngumbah motor jeung rea-rea deui.Lulus Sakola SDN Ciborelang I kec.Palasah Kabupaten Majalengka taun 1979.

4.SAKOLA SMP

Asa bagja bisa lulus tes asup SMP, disagedengeun loba keneh babaturan anu teu bisa nuluykeun sakola alatan teu mampuh beana.disatukangeun eta anu ngahihileudan dina pikiran nyaeta bakal langgeng atawa moal sakola, lantaran tekadna mung coba-coba da jelas kolot jalma teu boga.Minder jeung mindeng hulang huleng, lamun istirahat sok camaeu bae di tempat parkir sapeda.Beda jeung jabaturan anak jelema anu baroga pakaya, jajan pinuh, atawa pakean sarwa alus, alat tulis lengkep jeung marahal, ari kuring kantong oge nyieun tina kantong tarigu dijarumat kuleungeun, buku ipis jeung murah,Tapi sumanget teu eleh kubabaturan, cita-cita oge hayang jadi tentara, asa jojojoy kabita jadi tentara, pakean saregep, manggul bedil, terjun, kokorobasan dileuweung.

Dina samen tamat SMP malah kapincut ku babaturan hayang ka sakola Guru(SPG).Dibariskeun ku Guru Anu Ka SMA, SMEA, STM ,SGO jeung SPG, kuring ngabaris ka golongan SPG(Sakola Pendidikan Guru).Lulus ti SMPN Jatiwangi I Tahun 1982 saat gunung Galunggung Meletus

5.SAKOLA SPG(Sekolah Pendidikan Guru)

Ngaliwatan sabaraha tes, alhamduliliah kuring asup ka SPG(Sakola Pendidikan Guru).Bungah pacampur bingung, bungah bisa nincak sakola luhur, bingungna biayana teu boga, sabaraha poe ngaroel nyapeda ti Ciborelang sampe Majalengka, wanci sabada subuh tos mangkat ka majalengka datang panggasikna najan penjaga sakolana oge can datang kuring tos nyampak digarasi SPG Majalengka, ieu lalakon sampe sabulan, kadituna nyobaan nekad milu kos jeung babaturan bayarna dua rebu sabulan,kusabab narimakeun jalma teuboga barang nepi ka majalengka nyiar pacabakan atawa pagawean keur nambahan jajan sapopoena, kersaning gusti aya anu ngajak jadi palayan roti bakar, atuh asa mogok manggih gorowong.Satengahing Perjalanan teu mulus lantaran sababaraha perkara sakola ngalaman reuntas meh tilu bulana, lunta ka Jakarta seja dagang koran keur nyambung hirup,tapi anu aya teu tengtrem pipikiran inget kanasib, kunaon kudu reuntas,padahal kari sasaraha bulan deui. Tapi kersaning Gusti Allah kuduna sakola deui dak dumadak jorojoy hayang balik deui,Alhamdulilah kalayan Ridho Allah kuring bisa lulus sakola guru SPG Majalengka taun 1985.Kacatur hayang pakaulan bebeja kanu jadi bapa yen kuring tamat, bagjana anu jadi kolot, bungahna anu jadi bapa, anjeuna eureun tina tirakatna, anu salila kuring sakola, kolot kuring nirakatan kuring senen kemis jeung teu dahar sastoan atawa anu bernyawa, “subhanallah” eta hiji rusiah anu di buka panderi.

6.TRANSMIGRASI

Nagara tigerat ceuk basa ayeunamah resesi, biasana saban lulusan sakola guru teu hese nyiar gawe tapi harita pas lulusan kuring nagara kaayaan walurat teu ngangkat pagawe nagri, asa mubajir sakola teu guna gawe, lieur kamana koloyong, rek jadi pulisi teu aya dukungan jeung waragad teu cukup eta oge sarat-sarat mah geus dijieunkeun.dina hiji mangsa aya tatangga anu datang ti Sumatra , ngahaja neang kolotna, ubral obrol , jorojoy kabita kucaritaana jeung panasaran hayang nyaho tanah sabrang, teu hese kuring didaftarkeun jadi peserta Transmigran, Karang agung Ilir Musi Banyu Asin umatra Selatan tempat anyar kuring, nyiruruk di tempatkeun dileuweung golondongan jauh tina karamean, alhamdullilah kuring diangkat jadi guru honorer dikarang Agung Hilir Sumatra Selatan,anu jadi muridna barudak bawaan tijawa anggota keluarga Transmigrasi, tikelas hiji nepi ka kelas genep dikumpulkeun di bale desa anu can aya pangurusna, wangunan disekat ku papan saayana, bukuna saayana kiriman ti departemen Transmigrasi, guruna mung kuring anu lulusan ti SPG babaturanmah aya anu SMA, SMEA,STM aya oge ti SMP, daek teu daek kuring kapeto kepala Sekolahna darurat jeung honorer tapi gajihnamah sarua salawe rebuan.Lumangsung kana dua tauna, sagala macem pangalaman pait ketirna hamo bisa digambarkeun dina wangun tulisan.Dina hiji mangsa keur ngareureuh murak liwet, jol babaturan mawa surat tilembur anu eusina ngabejaan pun bapa ngantunkeun ti alam dunya sabulan katukang,nalangsa batin can bisa babakti kanu jadi kolot,ahirna jorojoy hayang mulang kalembur hayang ningali makam anu jadi kolot, asa dosa anu kacida gedena.Kuring menta surat izin ka UPTD geus kabacaeun yen saban anu mulang teu aya baralik deui,tekad kuring samentara bakal balik deui teu loba anu dibawa, baju jeung salin sacukupna, imah dititipkeun ka anak tatangga, lamun dua bulan teu mulang deui milik manehna.

7.NGUMBARA KA JAKARTA

Alpukah anu jadi lanceuk, “diditu sapiring,didieu sapiring, geus nyiar gawe dijakarta bae, kumaha lamun jadi satpam? Gajihna saratus rebu?”ceuk kilanceuk.Bari campur bingung kuring nyanggupan tapi hate inget keneh ka talapakan di Transmigrasi, dalah dikumaha lalakon kudu beda, ahirna bea keur ongkos ku kuring dipake nyieun sasarat, bral indit ka tempat panuduh kilanceuk, anu rek dijugjug PT Sulindo seahtera jurusa Jalan Mauk Tanggerang.Dua poe eta alamat disungsi tapi lebeng teu kapanggih najan asak tatanya, serah bongkokan maksudteh bebeja ka Grogol ka ki lanceuk, tapi anu aya totos podol nyarekan beak dengkak,”dasar orang udik, suruh kerja malah luntang lantung?harita can nete kaburuan imah ki lanceuk kaburu cacarekan, teu antaparah najan sungut teu wasa nyarita, mengkolkeun lengkah rek balik ka lembur bari taya hasil jeung duit ludes.Ningali tekad kuring anu ngabalieur, kilanceuk ngudag, “ dek kamana maneh? Bari rambisak cimata.”Ceu kuringmah rek balik deui ka kampung, didieumah ukur ngaripuhkeun bae?”ari maneh boga keur ongkosna?”.kuring nembalan rada teugeug,”najan leumpang oge pasti datang, teu kahalangan sagara jeung lautan”.Gura giru kilanceuk neangan injeuman ka tatanggana keur ngeupeulan kuring kanggo onggkos.”ieu lumayan keur ongkos!”, ceuk kilanceuk bari nyeselkeun kana keupeulan.”Nuhun ceu”, ceuk kuring bari ngalengkah bangun beurat.Buyar pangharepan, anu paya lengkah anu pinuh hanjelu, bet tega dulur ngagagalkeun cita-cita, padahal lamun rek bela, bokapa nganteurkeun nepika tempat tujuan, dasar lalakon kudu dilakonan nepika dinya.

Satengahing panarawangan anu polos, jorojoy hayang neang kilanceuk anu sa indung sabapa, ari tadimah lalakon jeung kilanceuk bareng bapa, kilanceuk di Kebayoran Baru dagang koran kuring milu diajar dagang koran, aya kompas, sinarPagi, buana minggu jeung liana deui, jeung nyobaan deui dagang cingcau, nyoba deu dagang donat, nyoba deui dagang buah segar tapi kasabaran masih diuji mungguh Allah, sadaya usaha taya anu hasil alias cukup sabeuteungeun.

8.USAHA DILEMBUR

Arana dikampung rada susah nyiar pacabakan mangsa harita,aya oge ukur bulu taneuh,buburuh kapabrik gula nya dikebon tiwuna, abong lain lumintu ahirna anu aya ngarasula da teu beubeunangan, beungeut racek, awak hideung hasilna teu sabaraha,nyobaan dagang macem-macem topi pakeun budak jeung kolot, eta oge modalna nuker sawah dua tauneun,saban pasar disungsi, saban lembur didatangan nyiar luang jeung daluang.Kersaning gusti dina lalakon dagang batina papanggih jodo ka indungna sibarudak kiwari.teu ria ria kawas nulian padu sah mungguh pangurus pancatat nikah tur meunang surat nikah,walurat bener kanyataan sagalana teu bisa dikedalkeun dina ieu tulisan.

Lima poe sabada nikah milu kuli kaJakarta, cul bae dagangan amah meuren jalan carita kudu ganti lalakon,ceuk kolot panganten ulah jauh sawan kasebutna, tapi dalah dikumaha geus teu boga duit, tanggung jawab anu jadi lalaki keur ngaresikoan pamajikan. Bener bae carita kolot, dijakarta cilaka bae, geus labuh, kacugak, kasabet linggis, antukna pun mamang nitah kuring balik heula ka Lembur, saminggu saterusna karek nuluykeun digawe, lancar.

9.DIANGKAT JADI PNS

Taun 1993 dikersakeun boga sicikal “Yuyun Trisnawati” katelah, sumanget deui kabangunan demi anak pamajikan.Keur neuleuman dunia patukangan, diajar masang batu kali, hol bapa kolot gigir, ngabejaan nyen kuring dipanggil pemberkasan, padahal karek sababaraha poe, kuring nanya ka Mandor, “aya sabaraha deui sesa uang makan?”. Mandor ohokeun bari nanya, “ kumaha aya naon, sesa uang makan ente aya sapuluh rebueun deui?”

Meuli sapatu kaloak opat rebu, bayar ongkos mobil treuk dua rebu, miang tengah peuting datang isuk carangcang tihang, nepi ka imah pas teu boga duit, kersaning Gusti Allah, alhamdulilah kuring diproses jadi PNS kalayan sababaraha halang palangan.

10. DIANGKAT JADI KETUA LPM DESA WARINGIN KEC.PALASAH KAB.MAJALENGKA